ഒരുപാട്

ഒരു  മഴപെയ്താലും പാട്

പെരുമഴ  പെയ്താലും പാട്

പുര  പെയ്താലതിലേറെ പാട്

പുറത്തറിയും മുറിപ്പാട്.

ഒരുപിടിയരിയുടെയന്നം

അതു വച്ചുവിളമ്പുന്ന ജന്മം

അരി വെന്തുതീരാനും പാട്

അകം വെന്താലാറാനും പാട്.

ഒരു പനി കൂടെയുണ്ടെന്നും

മറുപടി വായിലുണ്ടെന്നും

പണിതരുമ്പോളൊരുപാട്

പണം തരുമ്പോള്‍ വഴിപാട്

ഒരു  പൊന്നിന്‍ ചിരിയുണ്ട് കാതില്‍

ഒരു കോടിക്കസവുണ്ട് നെഞ്ചില്‍

പുര നിറഞ്ഞോളെന്നു പേര്

തല തിരിഞ്ഞോളല്ല,നേര്.

വല്ലോരും വന്നാലും ചോദ്യം 

നല്ലോരു വന്നാലും ചോദ്യം 

എന്തു കൊടുക്കുമെന്നാദ്യം 

എല്ലാം കൊടുക്കുവാന്‍ മോഹം.

ചോദ്യങ്ങള്‍  പുരവട്ടം ചുറ്റും 

ഉത്തരം പലവട്ടം മുട്ടും.

ഉത്തരം കാണുമ്പോള്‍ ഞെട്ടും 

ഉള്ളിലെ കെട്ടെല്ലാം പൊട്ടും.

ഒരുമുഴം കയറപ്പോള്‍ കണ്ണില്‍ 

ഒരു ഭയം കടലോളമുള്ളില്‍

വീണ്ടും വിചാരമുദിക്കും,ഒരു

വിശ്വാസമുള്ളില്‍ പുതുക്കും 

ഇഹലോകം വാടകവീട്

പരലോകമെന്‍ തറവാട്.