ദുആ

തൊണ്ണൂറ്റി ഒമ്പത് മുത്തുകള്‍
തികച്ചും ഉണ്ടായിരുന്നു

എന്റെ ജപമാലയില്‍ .

എനിക്കുറപ്പുണ്ട്,
അതില്‍ നിന്ന് ഒന്നുപോലും 

കൊഴിഞ്ഞു പോയിട്ടില്ലെന്ന്.

കാരണം,

ഞാനത് ഉപയോഗിക്കാതെ 

സൂക്ഷിച്ചു വച്ചിരിക്കയായിരുന്നു;

വിശുദ്ധ ഗ്രന്ഥത്തിന്റെ മുകളില്‍ .

പലപ്പോഴും അതെടുക്കാന്‍ മടിക്കുന്നത് 

തിരിച്ചു വക്കാനുള്ള ധൃതി കൊണ്ട് മാത്രം.

വിരലുകള്‍ വിറക്കാറില്ലെങ്കിലും 

ഇടയ്ക്കിടയ്ക്ക്  എണ്ണിനോക്കി 

ഞാനത് തിരിച്ചു വക്കുന്നു.

എന്‍റെ കൈരേഖകളപ്പോള്‍
വിശുദ്ധ ഗ്രന്ഥത്തിന്‍റെ

പുറം ചട്ടയില്‍ പതിയുന്നു.

അത്രമേല്‍ പൊടിയുണ്ടായിരിക്കും

എപ്പോഴും അതില്‍ .

ഇപ്പോള്‍ അതില്‍ ഒരടയാളവും 

അവശേഷിക്കുന്നില്ല.

എല്ലാം വീണ്ടും
പൊടികൊണ്ടു മൂടി.